21 лютага па ўсім свеце адзначаецца Міжнародны дзень роднай мовы. У розных краінах у гэты дзень адбываюцца розныя імпрэзы, на якіх тлумачыцца, чаму важна захоўваць моўную разнастайнась і берагчы родную мову.
Падобнае мерапрыемства прайшло і ў аграгарадку Аснежыцы, што пад Пінскам. Там у мясцовым Цэнтры культуры і адпачынку для вучняў Аснежыцкай сярэдняй школы зладзілі цікавю падзею. Спачатку перад шкалярамі 4-7 класаў выступілі дзяўчынкі з творчых калектываў цэнтра, яны распавялі, як важна быць беларусам і берагчы матчыну мову, чыталі верші і спявалі.
Потым настала чарга пінскіх хлопцаў, якія завіталі ў Аснежыцы ў госці. Прадпрымальнік Міхась Сярэдзіч і каваль Аляксей Наздрын правялі беларускамоўную віктарыну. У ёй з задавальненнем прынялі ўдзел дзеткі, яны чыталі вершы, загадвалі беларускія слоўцы і называлі па-беларуску розныя прадметы побыту. Самыя актыўныя атрымалі падарункі ад пінскіх гасцей.
Пасля віктарыны школьнікам паказалі камедыйны фільм «Прыгоды Падынгтона», агучаны па-беларуску.